Nour Elkholy

بما انك بتقولي الراجل بيفكر ازاي ف ارد ع الحته دي بس والباقي اي اخت هنا تكلمك فيه..مش هرسملك الدنيا فل وبتاع فلقصه دي لكن قليل الي بيفكر فموضوع اللون دا لأن فلعادي لو بيحبك فهيحب كل حاجه فيكي..وانا رأيي بلاش تفكري بالطريقه دي فحين أن لما ربنا يكتبلك وقت الجواز ابقي ساعتها هاتي واعملي اي حاجه تظبط اللون وهتبقي مسؤوله من راجل فطبيعي قصه الفلوس دي هتبقى اسهل من دلوقتي + بتقولي ١٨ ف فين الجواز وانتي فين وحتا لو..انتي مش وحشه عشان مفيش بني ادم وحش لان ببساطه ربنا مخلقش حد وحش..فشيلي فكره انك مش حلوه دي من دماغك..لحد هنا واي اخت ترد عليكي

خلينا ناخد الجزء الكويس وهو انك شايفه انك علي غلط ودا فحد ذاته حاجه كويسه..بس خليني اقولك حاجه مهمه..وبعدين ؟ وبعد العلاقه الوهميه دي بيحصل اي ؟ ولا حاجه حرفيا ودا طبعا نحط فعين الاعتبار أن لو فيه بينك وبينه خناقه وكبرت شويه مش ضامنين هيعمل اي بالصور+ متحاوليش تقولي للي معاكي دلوقتي علي اي كان بيحصل مع قريبك دا لأن سترك ربنا متفضحيش نفسك والأهم من كل دا طالما شايفه أن الي معاكي دلوقتي دا نضيف وكويس وكل حاجه تمام فيه..ابعدي عن كل الخرا دا وخليكي معاه هو بس..فكري فيها بالعكس هتفهمي قصدي اي

عايز اقولك إن انا فلمجال دا بقالي شويه حلوين وبقولك متسمعيش كلام حد طالما حباه وبعد م تنجحي أن شاء الله هتلاقيهم بيتكلموا عنك أحسن كلام..خديها من اخ او صاحب أو ايا كان..خليكي ورا مشروعك لانه فعلا حلو ولو عايزه تسألي عن حاجه او فيه حاجه مش عرفاها أو حاجه واقفه قدامك قوليلي وعلي اد مقدر هفيدك..

لعلمك..فكره انك بين كل كام جمله تقولي ربنا..دا كفيل انك ف الطريق الصح برغم كل *** الي فحياتك دا..لكن؟ ربنا عز وجل مخلقش حد وحش لانه قال ف كتابه فيما معناه وانا اكيد فاكر الآية بس بحاول ابسطها..أن ربنا خلقك ف احسن تقويم ودا معناه كتير مش بس كشكل..حتا علي سبيل الكلام أن البني ادم عند ربنا احسن من الملائكه و الله اعلم بس الفكره أن الإنسان مخير انما الملائكه بنعبد ربنا بس..عشان مروحش بيكي كتير قصد كلامي أن مهما عملتي ومهما قولتي ارجعي ل ربنا..هو احن عليكي من امك وابوكي حتا لو كانوا احسن اتنين ع الأرض..وفكره انك خايفه ربنا ميتقبلش توبتك مثلا ف اوعي تفكري بالطريقه دي ابداااا..ربنا مش هيكلفك امر الا وعارف سبحانه وتعالى انك اد الأمر دا

يلا الحمد لله علي كل حال وان شاء الله تبقي ديما بخير

مستغربك انك بتبررلي لنفسك بصراحه..متبرريش تبريرات مش صح..اصل هفهمك..هتعززي نفسك امتا ؟ هتحسي بكرامتك امتا؟ الخطوه كانت غلط من الاول ؟ اه غلط بس كدا كدا حصلت خلاص ف ملهاش لازمه نتكلم فيها بس وبعدين ؟ نعمل سكيب ازاي من الزون دي؟ عززي نفسك وكبري مقامك فعينه وعين أمه وقبله هو ف يبقا ف عينك انتي..فوقي لانك ف حفره مقرفه ومتعبه لدرجه مش حلوه..لازم تفوقي حرفيآ..انا مش بعنفك والله بس لازم تفوقي فعلا

يعني وانتي عندك ست سنين ؟ خليني اقولك انك اصلا تحكي حاجه زي كدا ف دي خطوه كويسه مش وحشه.. الفكره بس ف أن سؤال ليه ديما بيبقا صعب حرفيآ..بقولك كدا عشان حاسس ب الي بتقوليه بس نصيحه أو إقتراح..صلي وادعيله ربنا يهديه

حبك وتقبلك لنفسك دا كفيل يبين انك شخصيه جميله المهم انها متقلبش نرجسه وغير كدا انتي ممكن تتأخري شويه عشان ربنا شايلك نصيبك ف شخص معين هيخليكي مرتاحه جدا ويكون سبب ف أن ربنا يجعله يريحك ويعوضك علي كل لحظه وكل حرف سمعتيه ف اي وقت..حاولي تبصي للموضوع من كل الإتجاهات اه انتي كدا شايفه من اتجاه بس لازم من كل الجوانب عشان اعرف اقول هل العيب فيا انا ؟ هل شكي ف نفسي صح ؟..الشعراوي ليه جمله من كلامه حلوه اوييي بيقولك أن كل بني ادم رزقه زي السهم والسهم اُطلق خلاص بس المسأله مسأله وقت مش اكتر فعلا

حرفيا ومش مزايده ورب الآيات..بس يستغرب الي بيقول أنه عايز ينتحر ومش بتفه من معاناته والله العظيم بس هل فيه استيعاب ما بعد م دا يحصل ؟ فاهمه اي هيحصل ؟ دي مصيبه قسم بالله..فيه مليااااار حل الا دا لانه عمره م هيكون حل..استعيذي بالله من كل الأفكار دي

كانت دي طريقه تربيه جدتي وجدي ف بقت تجيلي انا واختي بالتواتر..وحرفيا هما حلين.. أما انك تقربي ل ربنا اكتر واكتر وتدعي أنه يصلح الحال أو انك تبادري ف انك متداخله معاهم ف اي حاجه

يمكن مشكلتي قريبه من مشكلتك شويه..بس انتي بتقولي انك بتصلي وقريبه من ربنا وفيه هنا تناقض مينفعش يكون موجود..مينفعش تبقي قريبه من ربنا و فنفس الوقت تقولي أو تحكي كدا علي اهلك (ابوكي و امك) لان دا غلط ومتفهمه موضوع أنهم ممكن يكونوا فعلا ضاغطين عليكي وتشوفي أن دا اوڤر ومش بالطريقه دي وكل دا..بس انا كدا مع والدتي والي لحد النهارده بحاول افهمه أن كانت دي تربيتها من وهي صغيره

اولا مينفعش تقولي انك تخينه (بالمصري) ثانيا انا فنفس مشكلتك بس ف السجاير بس يمكن الي بعمله بفشل فيه بس انا شايف أن إرادتك اقوي مني ف هقولك..متحرميش نفسك من حاجه ودا طبعا ملوش علاقه بتجربتي انا..بتكلم علي تجربتك..متحرميش نفسك من حاجه لكن لازم تبقي شاطره ف حتت امتا اكل اي ! لو مفروض تاكلي طبق حلا واحد ولاقيتي نفسك داخله علي التاني والتالت قومي..سيبي الطبق..قومي اعملي اي حاجه حتا لو ابلكيشن ع موبايلك تمارين مثلا..صلي..حاولي تعملي..(حاولي) زي سيدنا داوود كان بيصوم يوم ويفطر يوم ومش شرط تنجحي ف اول مره بالعكس..انا بعرض عليكي الفكره وبقولك هتفشلي ف الاول لكن مع اصرارك وارداتك الي انا شايفها ف كلامك عارف انك هتنجحي

حاول بدل المره مليون مره ومع كل مره خلي اسلوبك احسن من المره الي قبلها ووضح اد اي انتا محتاج دا وصلي وادعي ربنا يهديهم عليك ويجعلك بار بيهم

احكي ل ربنا وصدقني قربك ل ربنا دا هيحللك كل الي شايفه مستحيل..ومن رأي بلاش تتكلم مع حد وصلي وادعي أن ربنا يهديه ويرجعه ل عقله وبيته ويرده رد جميل

انا جنبك بعد ربنا..لو عايز نبقا صحاب انا موجودلك وننزل ونتقابل ونحكي كل الي انتا عايزه..ربنا يصلح حالك ويبعد عنك اي خطوه تضر بيها نفسك

خليكي ورا كلام والدتك لو روحك ف خالك..فاهمه يعني اي لو روحك فيه ؟ مليار ف الميه ليها اسباب تقول بيها أن لا بلاش وترفض كل كلامك دا..اوعييييي..اوعييي تبقي عاقة فيها.. قسم برب الايمان هتندمي ندم عمرك حرفياااا..ربنا قال الحاله الوحيده الي متمشيش ورا كلامها أنه لو قالتلك اشركي بالله وحتا لما تقول كدا ردك يبقا بهدوء وبحترام..انا من رأي خليكي معاها ولو علي حبك ل خالك ف اخويا ف الكومنت قالك تتصرفي ازاي

بعد كل الكلام دا ف انا كمان واثق انك ادها واكتر من كدا..وربنا يوفقك فحياتك ويراضيكي ويرضي عنك ويفتحلك كل سكك الخير والرضي ويطبطب علي قلبك برحمته الواسعه ويهديكي عليهم ويهديهم عليكي ويصلح حالك ويوقفلك ولاد الحلال فكل طريق انتي وانا والكل يارب

طيب اهلك؟ كلمي ربنا عليهم وادعيلهم ف صلاتك أن ربنا يهديهم عليكي واوعي تنسي أن ربنا جل في علاه أمرك بطاعتهم وشفيعك وصاكي عليهم..ربنا يهديكي ويهديهم ويهديني معاكو ويهدي الجميع

خلينا متفقين أن آخر جمله فكلامك دا محتاجين نفكر فيها مليوووون مره والبديهي انك عارفه لو عملتي كدا مش هيبقا ليكي حساب اصلا تتحاسبي عليه ف ابعدي الفكره عن بالك واستغفري ربك..امتحانات والكلام دا..اسعي..اجتهدي..حاولي..بدل المره مليون مره وخليكي فاهمه أن الي هيجازيكي عن دا رب البيت مش العباد وقربي ل ربنا مش بس عشان النتيجه أو كدا..قربي لانك لازم تقربي وخليكي وانتي بتصلي تبقي مكسوفه انك بتصلي عشان شئ معين..ودا مش عيب..ربنا من رحمته جعل رحمه واحده بس بينا..ف حتا دماغك مش هتستوعب رحمته عامله إزاي

لا مهو انتي متخليش فدماغك حاجه اسمها كره..الي مبتحبوش متكرههوش لكن؟ عززي نفسك ل ابعد الحدود وخليكي صفحه واحده بسسسس..الي قدامي عرف يكسبها خير وهيلاقي مني الخير ولو معرفش مش هيبقى فيه صفحه تتفتح من اول وجديد..وربنا يوفقك عموما ويراضيكي وعن اهلك ؟ ربك أمرك بطاعتهم وشفيعك وصاكي عليهم يعني اي مشكله ليكي منهم اقرأي فكتاب ربنا تتصرفي ازاي ونصيحه مني..لو عايزه تكلمي ربنا اتوضي وصلي ولو عايزه ربنا يكلمك اقرأي كتابه

خدها مني وخليها علي ربك..روح بس بنيه صله الرحم وانك عايز تكون جنبها وخليها علي ربك وان شاء الله الدنيا تمشي كويس

كمان بتقولي انك ف ث عام.. يعني بعد كل المراجيح دي وبتعافري عشان توصلي لحل وانا بديكي مسكن دلوقتي لكن لو عايزه الحل الأساسي الي حرفيا مش هيبقى فيه بعده حل..قربي ل ربنا واتكلمي معاه كأنك بتكلمي شخص قدامك ولله المثل الاعلي طبعا..دا الحل الوحيد والوحيد أنه يطبطب علي قلبك هو ربنا.. وربنا يوفقك فحياتك ويراضيكي ويرضي عنك

+ كمان عايز اقولك إن هو مش طبيعي أن حد يقارن شخص بشخص لان كدا بيكرهوني ف الي بيقارنوني معاه ودا عن تجربه علفكرا بس خليكي ديما واثقه أن ربك رب الخير وعادي جدا كل دا يحصل عشان بس ربنا عايز يسمع منك كلمه يارب الي من جواكي عشان يبهرك بعظمته وبقدرته وإن شاء الله تأجري علي كل دا والصبر دا

خلينا متفقين انك حاجه حلوه جدا ما شاء الله علي كل الصبر دا..بس تعرفي؟..ربنا بيقول ف كتابه العزيز بعد بسم الله الرحمن الرحيم ( ولقد نعلم أنك يضيق صدرك بما يقولون ) فاهمه الآية ؟ ربنا شايف ومطلع علي كل دا حتا بعدها قالك فسبح بحمد ربك وكن من الشاكرين واعبد ربك حتى يأتيك اليقين صدق الله العظيم..اقصد أن انتي حاجه كويسه وعلي كل م شوفتي دا خرجتي منه ب شئ إيجابي وانك لو اتحطيتي ف موقف هتعرفي تتصرفي صح جدا

الموضوع سهل جدا واسهل من ما ييجي علبالك..(عززي نفسك)

معلش هو يعني اي بنت الاصول لما تحب؟ خلينا متفقين أن سواء هنا او هنا فيه الكويس وفيه الي مش كويس بس بردو خلينا متفقين انتي متعرفيش اي كميه الضغوط الي كان فيها عشان تاخدي قرار وتقولي الكلام دا..يمكن ضغط اهله كان اصعب من اي حاجه وبعدين يمين او شمال هو طبيعي يراضي اهله خصوصا أنه شايف أن اهلك ماسكين فحاجه سهل يبقا ليها بديل وانا هنا م بدافع عنه قسم برب البيت انا بس برد علي كلامك

طبيعي دا الي يتحس ف اي علاقه جديده حتا لو علاقه صحاب..دا أمر طبيعي بس امتا اخد قرار اني ابقا موجود او لا..لما اكون ف الموضوع نفسه..هل مرتاح ؟ هل الموضوع ماشي كويس ؟