Ahmed Zakaria

كامل احترامي لحضرتك و لمشاعرك الطيبه انك حابه تساعدي ، وجهة نظرى ان الاساله الطبيه مش مكانها السوشيال ميديا لان كل حاله بيكون ليها تعامل مختلف عن غيرها مينفعش نعمم التجربه ، ممكن مستشفي متخصصه تفيدك اكتر بكتير و ماشاء الله مصر بقت مميزه جدا و ليه شهره عالميه في مجال الطب عموما و الجراحه خصوصا ، ربنا يشفيها و يعافيها و يبدلها بالمها درجات في الجنه ❤️

يؤسفني اقولك ان الزمن هيثبتلك ان اهلك صح و ان تفكيرهم هو الصح ، رغم اني راجل زيه و المفروض اقولك اهلك مش فاهمين الحب اللي بينكم و ظالمينك و الكلام بتاع اسامه منير الجميل ده ، لكن الواقع غير كده تماما ، اه الافضل انه يكون مرتاح ماديا علي اقل تقدير في نفس مستوي اهلك المادي و الاجتماعي ، لان بمجرد ما غشاوة الحب تتشال عن عينك هتلاقي نفسك مش عارفه تعيشي ف مستوي اقل من اللي كنتي عايشه فيه و ده هيعمل مشاكل كبيره ف علاقاتكم هتتمني انها تكون مشاكل واضحه لانك هتلاقي مشاكل بدون اسباب واضحه هيكون السبب الخفي فيها هو الفرق ده ، و اهلك صح انه يمضي قايمه لان الزمن ده متقلب و مفيش حد مضمون غير اهلك ، أتمنى ان كل عضو عندك يقوم بوظيفته اللي اتخلق ليها و العقل هو اللي يحكم لان ده دوره مش دور القلب

انك ترفضي دلوقتي اهون بالكتير من انك ترفضي بعد كده ، مش هكلمك من ناحيتك ليك اجر و ثواب و الكلام اللي انتي اكيد سمعتيه من كل اللي حواليكي ، هكلمك من ناحية انك هتتجوزي واحد هتكوني عينه اللي بيشوف بيها حرفيا هيشوف كل حاجه بعينك و دي امانه كبيره ، هتشيلي مسؤلية بيت لوحدك ، هتشيلي مسؤلية اولاد لوحدك ، هتشوفي صاحباتك عايشين حياه مش هتقدر تعيشيها ولادك هيحتاجوا منك دعم نفسي كبير جدا ف النقطه دي ، هو هيجيله فترات هيحس انه عاجز و انه مقصر و هيتغير معاكي و هيكون مطلوب منك تقابلي ده بكل حب و تطمنيه ، لو تقدرى تعملي ده ف الدنيا ربنا يجازيكي الجنه باذن الله لو مش هتقدرى بلاش تكسريه

خلينا ناخدهم سؤال سؤال ، اولا بيصلي و لا لا دي بسيطه جدا تعرفيها من الأوقات اللي بتتكلموا فيها و من المواقف اللي بيذكرهالك ، مدخن ولا لا و بيكلم بنات و لا لا ؟ ده يخلينا نسأل سؤال تاني خالص ، انتي ايه بالنسباله واضح انها مجرد صحوبيه و صحوبية سوشيال كمان لانها لو غير كده كنتي هتجاوبي علي كل الاساله دي ، فا انتي بنات و هو بيكلمك يبقي اه وارد جدا يكون بيكلم بنات ما هو مكانش امام جامع و قرر يبوظ علي ايدك ، اتعاملي مع اللي قدامك باللي انتي شايفاه مش اللي بيقوله ، و الله يرضي عنكن انتي اغلي من كده و اهلك اغلي من كده اللي بيدخل من الشباك عمره ما هيعرف طريق الباب

عمرك ما هتنسي مرحله ده متفقين عليه ، بس لازم يكون ذكرك ليها زي ذكرك لمرحلة الطفوله انها عدت خلاص و ده اللي اقصده

ربنا يرزقك و يرزقه خيرىّ الدنيا و الاخره

عشان كده بالظبط بقولك هتفشلي تاني ، انتي عشان تدخلي تجربه تانيه محتاجه تنسي الاولي بكل تفاصيلها بكل حلو و مر و الا هتدخلي في دوامه من المقارنات هتفسد عليكي حياتك التانيه ، اكتمال الشفاء من التجربه الاول انك متذكريهاش ف كلامك اصلا ، محدش فينا دلوقتي بيذكر ف كلامه مرحلة ابتدائي و اد ايه كان زهقان انه بيصحي بدرى و مبسوط بحصة المزيكا و الفسحه ده ليه !؟ لانها مرحله و عدت هذكرها على سبيل الذكريات لكن مش طبيعي اني اقولها وسط كلامي العادي عن مرحلة ثانوي ، اما توصلي للمرحله دي فكرى ف علاقه جديده قبل كده متفكريش

كلامك بيدل علي انك داخله علي تجربه فاشله تانيه ، انتي لسه عايشه الم التجربه الاولي ، خدي وقتك و متفكريش ف اي خطوه جديده قبل ما تحسي ان شفاؤك اكتمل 100% بلاش تفشلي مرتين

ان كان علي خلق كما قلتي ما نظر اليك (نظرات متكرره علي حد قولك) و ان كان علي خلق كما قلتي ما احتفظ برقمك ، و ان لم تتعلقي بيه لم فتشتي خلفه ووصلتي لصفحته و علمتي انه محتفظ برقمك ، باختصار الموضوع ممكن يكون كان اعجاب متبادل بينك و بينه و ده عادة بيحصل اثناء فترة الدراسه و بانتهاء الدراسه انتهى كل شيء من ناحيته فانهيه من ناحيتك انتي كمان ، انهيه و انتي شايفه انه كان اعجاب من ناحيته زي ما كان اعجاب من ناحيتك مش انه سيدنا يوسف اللي عملك بلوك و قفل حسابه و الكلام ده

عن تجربتي اكل مسلوق و مش باكل بعد المغرب و مفيش اكل من الشارع ، و الافضل طبعا راي دكتور لان كل حاله ليها ظروفها

اولا باباكي لازم يعرف ايا كان رد فعله ايه هو هيتصرف كراجل و هيتصرف و هو مراعي انه اخوه لحد دلوقتي لكن لو لا قدر الله عرف متاخر او عرف بفضيحه مش هيراعي ان ده اخوه و لا ان دي زوجته ، كل تاخير في انه يعرف بيكبر حجم المشكله ، ثانيا والدتك لازم تكون اكثر حده و بالبلدي تبين انيابها و متبانش مكسوره و لا خايفه ع البيت عشان تقدر توقف كل واحد عند حده