خالد رشدي

مبدأياً مفيش حد بيذاكر صح وبيفشل وحطي تحت صح مليون خط عشان ممكن الواحد يبذل مجهود جبار ف المذاكره بس مش متوجه صح... بالنسبه لمشاكل البيت فا مفيش بيت مفيهوش مشاكل وده من منطلق اني معرفش ايه نوع المشاكل الي عندك... مفيش طريقة مذاكره معينه كل واحد وليه طريقته انا مثلاً المذاكره بالكتابه بالنسبالي تضييع وقت وبرجع انسى فا بفضل اني افضل اقرأ واعيد وازيد لحد ما المعلومات تثبت وبالنسبه لموضوع التركيز ف الحصص فا احسن حاجه تعمليها انك تقعدي مع ناس مهتمه وبتذاكر ودايماً تحضري بدري وتقعدي قدام واي حد بيشتتك من صحابك حاولي تبعدي عنه ومتقعديش جمبه... ثانويه عامه عايزه ذكاء ف تقسيم المجهود وصبر مش فرم على الفاضي والمليان وربنا يوفقك وييسرلك امورك... لا تقلقي لأنه لا يكلف الله نفساً الا وسعها اعملي الي عليكي وسيبي الباقي على ربنا متشيليش الهم وخلاص ركزي وذاكري وربنا شايف وعارف والنتيجه دي بتاعته احنا بنسعى بس.

بصي يا اخت مي... كلنا بنتعرض لضغوطات من اهالينا ومن الحياة عموماً وساعات بنضطر نوافق على حاجات احنا مش حابينها بس الاكيد ان اهالينا بلا استثناء نفسهم يشوفونا حاجه كبيره ويأمنوا لنا مستقبلنا ويتأكدوا انهم مقصروش وزي ما بيقولوا يحطونا على ال track عشان هما مش باقيين لنا طول العمر... محدش بيحب حاجه غصب عنه فليه متكلميش اهلك وتحكي لهم... يمكن يقنعوكي باللي هما عايزينه او يمكن لما يسمعوا منك ويحطوا كلامك في عين الاعتبار يعرفوا مدى الضغط اللي هما حاطينك فيه... كل اللي محتاجة تعمليه هو انك تقعدي مع نفسك تفكري انتي نفسك في ايه لكن متقفيش هنا انا عايزك تفكري في توابع الحاجه اللي انتي عايزاها ومدى جدوتها ومستقبلها عامل ازاي... اديكي اهو بتقولي انك مش قادره تذاكري ولا تروحي دروس ولا تفكري... ايه هتفضلي واقفه ومستسلمه للي انتي فيه؟ مش معقول كل ما نتعرض لضغط ننهار ونسيب كل اللي في ايدنا... الحياة فرص والدنيا مش مستحمله تردد وخوف وهلع... انتي محتاجه تفهمي نفسك وتفهمي اللي انتي عايزاه قبل ما تحاولي تفهمي اهلك... الحياة بتتعاش مره واحده فيا نعيشها رافعين راسنا ونحاول نتأقلم ونعدي يا نقف محلك سر ونستنى القيامه تقوم ولا حاجه... احنا مهما الناس طلبت مننا ومهما الناس فرضت علينا في الاخر احنا اللي هنحاسب على اختياراتنا... زي واحد في واحده عاجباه وعايز يخطبها بس أهله بيقولوا له انها مش حلوه وبعد كده مش هتبقى ماليه عينه... ممكن ياخدها عند وممكن ياخد كلامهم بعين الاعتبار كده ولا كده هو اللي هيحاسب... انتي في ثانويه واجلتي ففي سنه already راحت يبقى نركز في اللي جي ونحاول نجمع شتات نفسنا؟ ولا نرمي الي ف ايدنا وضيع الباقي من عمرنا؟