شوف اكتر حاجة انت متمكن منها او موهوب فيها و انشر عنها . يعني مثلا لو شاطر في المذاكرة نزل فيديوهات تساعد على الدراسة و تنظيم الوقت . لو شاطر في الرياضة نزل فيديوهات عن فوايد الرياضة و تبدأ منين و ازاي و هكذا . شوف اكتر حاجة انت عندك فيها معلومات كتير و نزل عنها .
تم النشر الثلاثاء، ٢٢ أغسطس ٢٠٢٣
بصي ابدأي واحدة واحدة و أهم حاجة تكوني عارفة ان لو ربنا مكنش بيحبك مكنش هيزرع فيكي احساس انك عايزة تقربي منه. اهم اهم حاجة فعلا متفوتيش فروض ، ممكن في البداية يكون صعب انك تلتزمي او مش قادرة تصلي اصلا بس ده فعلا اهم حاجة وافتكري ان الصلاة هي اول حاجة هنتسأل عليها يوم القيامة ، فصلي حتى لو مكنتيش مركزة او يدوبك بتعملي حركات بجسمك بس على الاقل هيكون احسن من مفيش و فعلا مع التزامك بالصلاة هتلاقي انك مبسوطة و مرتاحة و هتلاقي ان من نفسك عايزة تصلي و ممكن تزودي نوافل كمان . هيساعدك جدا في انك تلتزمي بالصلاة كتاب (فاتتني صلاة) للكاتب اسلام جمال . ثاني اهم حاجة ابعدي عن أي صاحب بعيد عن ربنا لحد ما على الاقل تحطي رجلك عن الطريق ، مش محتاجة اقولك عن خطر ان يكون جمبك صديق بعيد عن ربنا في الحالة ده لانه يا اما هيخليكي تضعفي. و تبعدي ثاني يا اما هيفضل يقولك هتعمل فيها شيخة و بتاع و هيحبطك جدا بجد فابعدي عنهم الفترة ده . نفس الكلام مع عيلتك لو انت عيلتك بعيدة عن ربنا حاولي متبينيش في البداية بس عشان ميحبطوكيش او يقولولك شيخة و كلام سلبي و هكذا . حاولي نفسك بناس قريبة من ربنا ، يعني مثلا لو بتستخدم تيك توك كتير اعملي فولو لناس محتواهم ديني (زي مثلا رحمة (رحرح) و مصطفى امين و طارق النمر ) نفس الكلام على اي ابليكيشن حاولي تعملي فولو لناس محتواهم ديني بحيث انك تكوني محاولة بربنا طول الوقت . اسمعي السيرة النبوية لأحمد عامر موجودة على يوتيوب و سبوتيفاي ، هي مش هدف السيرة الاساسي انك تعرفي تاريخ الإسلام و تعرفي النبي عليه الصلاة والسلام على قد ما هدفها انك تتعرفي على الإسلام، تتعرفي على ربنا ، تعرفي ازاي الإسلام عايزك تكوني و ايه صفات المسلم الحق ، هتوريكي إعجاز القرءان و عظمة ربنا و قد ايه الصحابة استعملها عشان الدين و قد ايه احنا في غفلة ! و ماشاءالله احمد عامر فيه قبول رهيب يعمي فيديو مدته ساعة صدقيني مش هتحسي فيهم بدقيقة ملل . بعد ما تخلصي السيرة هتلاقي جلسات تدبر قرءان لأحمد عامر بردة و ده حرفيا عظمة العظمة بجد لازم تسمعيها . انا عارفة ان الموضوع هيكون صعب في البداية بس واحدة واحدة كله هييجي و هتوصلك للي نفسك فيه ، هيعدي عليكي ايام تبقى ملتزمة و ايام تفوتي فروض و ده طبيعي لأنك لسة بتحطي رجلك على الطريق . افتكري ان من توجه إلى الاستقامة وهو شاب كان من السبعة اللي ربنا هيظلهم بلله يوم القيامة ، و من تقرب إلي شبرًا؛ تقربت منه ذراعًا، وإن تقرب مني ذراعًا؛ تقربت منه باعًا، وإن أتاني يمشي؛ أتيته هرولة . و ربنا بيفرح بالعيد التائب و بيتباهى به قدام الملائكة. وان شاء الله ربنا يثبتك و يقويكي و يرزقك حسن الخاتمة و العمل الصالح ♡
تم النشر الثلاثاء، ٢٢ أغسطس ٢٠٢٣
بصي انت حاليا في سن اسمه سن المراهقة زي ما انت قلتي و في السن ده انت المفروض تعيشي سنك و تفرحي و حوار الحب و الارتباط ده مش وقته خالص ولو افترضنا انه حقيقي لو هو بيحبك بجد مش هيرضى يكون معاكي في علاقة مترضيش ربنا بصي انا قريت قبل كدة (بس مش متأكدة من المعلومة) ان ربنا بيكتب اسمك جمب اسم الشخص اللي هتتجوزيه من قبل ما تتولدي اصلا فلو كان هو الشخص المنشود بإذن الله فهو هييجي في وقته عيشي سنك و ابعدي عن أي حاجة حرام و افتكري ان من توجه إلى الاستقامة و هو شاب كان من السبعة اللي ربنا هيظلهم بظله يوم القيامة ان شاء اللع
تم النشر الجمعة، ١٨ أغسطس ٢٠٢٣
بصي انا الحمدلله طلعت الرابعة على المحافظة و الثانية على المدرسة و جبت مجموع ٩٩.٥% في ثالثة اعدادي وان شاء الله هدخل اولى ثانوي فلو محتاجة نصيحتي ، بصي اهم حاجة متراكميش دروس خالص اي حاجة تاخديها تروحي تذاكريها على طول . ثاني حاجة متاخديش دروس كتير في حاجات مش هتفيدك يعني شوفي فعلا المواد اللي انت ضعيفة فيها ده اللي تاخدي فيها دروس غير كدة تضييع فلوس و وقت و مجهود، خليكي معتمدة على المدرسة احسن . ثالث حاجة خلصي وقت محدد و مكان محدد للمذاكرة . رابع حاجة قسمي وقت مذاكرتك على سيشنات يعني مثلا 50 دقيقة مذاكرة و 10 دقايق بريك او ساعتين مذاكرة و نص ساعة بريك كدة يعني . خامس حاجة حاولي ت romanticize المذاكرة يعني مثلا ذاكري في مكان نظيف بلبس نظيف و ريحة المكان حلوة و النور كويس و اشربي حاجة دافية وانتي بتذاكري بحيث انك تعملي جو لطيف و مشجع على المذاكرة سادس حاجة خلصي يوم كامل في الأسبوع متذاكريش فيه خالص يكون ده جايزة على تعبك طول الاسبوع . سابع حاجة اعملي ملخصات للدروس . ثامن حاجة حلي كتيير جدا ده اكتر حاجة ممكن تفيدك . تاسع حاجة و أهم حاجة حرفيا صلاتك و العبي رياضة ولو نص ساعة مشي كل يوم و بجد هتفرق معاكي خالص . عاشر حاجة ابعدي عن أي حد ممكن يحبطك او يقلل من مجهودك و ابعدي عن أي شخص مش بيذاكر و بيقف في طريقك . اخر حاجة متجيش على نفسك جامد في البداية خديها واحدة واحدة و تعالى قبل الامتحانات بشهرين ابدأي لمي كل المناهج و ابدأي راجعي و عايزة اقولك ان الشهرين دول لو انت مفتحتيش كتاب من اول السنة كافيين جدا انك تطلعي من الأوائل لو استغلتيهم صح . خلي بالك الموضوع محتاج مجهود و تعب و ربنا يوفقك يارب و يناولك كل اللي تتمنيه ♡
تم النشر الجمعة، ١٨ أغسطس ٢٠٢٣
لعرض الملف الشخصي في فدني اضغط هنا