Kholoud K

مساء الخير بصي يا ستي ...هو عادي انك تتجوزي حد اصغر منك طبعا مفهاش مشكلة ...يمكن بعض العادات في بعض الأسر بترفض ده ... بس طبعا عادي مفهوش مشكله...بس اهم حاجه عشان يبقي مفيش مشكله فعلا ١_ هل فرق السن ده باين برده في التفكير ولا لا ...يعني لو هو تفكيره اصغر منك دي هتكون حاجه متعبه جداا في الحياه ٢_ هو فرق السن الي بينكم اد ايه يعني سنه ولا اتنين ولا بتكلم في ٥ او ١٠ ...... لو الموضوع وصل ل٥ او ١٠ بلاش احسن ده هو كده في حته تانيه خالص غيرك ٣_ غير فرق السن كام.. هو في انتهي مرحله في السن يعني هل لسه في أول ال٢٠ ولا النص ولا الاخر.... وبرده تفرق جدا... يعني هل هو نضج فكريا واستقر نفسيا ولا لا... ٤_ وهو واهله شايفين الفرق ده ولا لا ؟ ٥_ حاجه يمكن مش مهمه عند بعض الناس ... المظهر الخارجي باين مين فيكم اكبر من التاني.... بشكل عام ... الزواج من شاب اصغر منك سنا عادي بس اهم حاجه ميبقاش حد فيكم حاسس بالفرق ده داخليا ولا يبان ع شكلكم ونصيحه لو هتكملي معاه متتكلميش في موضوع السن ده خالص واتعاملي ديما معاه انه اكبر منك ويعرف اكتر منك وديما بصي لنفسك انك اصغر منه .... ده هينعكس عليكم وهيفرق جدا في تعاملتكم ... ويارب تكون وجهه نظري وصلتك وربنا يوفقك ان شاء الله ويرزقك يالي يتقي ربنا فيكي

اهربي الارتباط بالنوعيه دي مرهق جدا طول الوقت هتعيشي في توتر خايفه انه يسيبك وكل خلاف هتسمعي جمله "انا كنت مرتاح من كل ده انا عملت في نفسي كده ليه ده انا كنت وكنت وكنت" وبعد شويه هيبقي عليكي بشكل غير معلن مسئوليه الراجل هتحسي انك ست وراجل في نفس الوقت وكل ده عشان تحافظي علي استقرار البيت خصوصا لو في اطفال الجواز مسئولية كبيره اوووووى مش مخيفه بس كبيره ومفهاش هزار ولا تجربه عابرة لان الخروج منها مؤلم جدا جدا وناس كتير بيجلها عقد بعد الانفصال والنظرة للحياة بتختلف بعد الانفصال. يبقي من البدايه نختار صح راجل بما تحمله الكلمه من معني يبقي قد المسئوليه لان مسئوليه الجواز مش ماديه بس دي ماديه وعاطفيه و تضحيات كتيره من الطرفين ومراحل كتير وتقلبات الطرفين بيمروا بيها ده غير الحاجات الخارجيه الي بتأثر علي علاقتهم فلو هما مش ماسكين في بعض اوى وبيحاولوا هما الاتنين عمر ما العلاقه دي هتنجح حتي لو منفصلوش ممكن يعيشوا مع بعض منفصلين فكريا وعاطفيا وده الأسوأ مفيش علاقه بتنجح من طرف واحد ربنا يوفقك وتلاقي الراجل الي يراعي ربنا فيكي

عجبني فيكي انك مقيمة الوضع الي أنتي فيه عارفه ان ده غلط وانه حتي مينفعش للجواز احساسك بالتعلق بيه ممكن يكون ناتج من كذا حاجه زي انك وحيده وهو الي دخل حياتك وحس بيكي والخ ممكن يكون ده اول مره تحسي باحساس الحب (بس ده مش حب حقيقي وهقولك ليه) وممكن لأنك في مقتبل العمر ومن الواضح كده ان باباكي ومامتك قافلين عليكي و كانوا طول ال١٧ سنه بيحاولوا يحافظوا عليكي فاول ما يبقي عندك نافذه للحياه وتقدري تاخدي قرار هو أول واحد اتعلقتي بيه طب ليه ده مش حب حقيقي لان الحب الحقيقي يا عزيزتي حب قلب وعقل توافق وتناغم في الصفات والتربية والتعليم حد كده بتحسي انه بيكملك حرفيا مش كلام وخلاص والأهم من الحب انك تكوني مع حد بيراعى ربنا فيكي لان الجمال بيروح والشباب بينتهي والصحة بتتدهور بس التربية والخوف من ربنا بيفضلوا مدي الحياة كل الكلام إلى فوق ده ليه عشان ااكدلك انه مش حب اصلا ده تعلق لو اقتنعتي... نكمل ازاي تفكي من التعلق ده وتخلعي بسرعه 😀 ١ صلي ٢ اشغلي نفسك.... الفراغ هو عدوك الاول لو الفراغ اختفي الكائن ده هيختفي ٣ التطوع يا عزيزتي... هيفرق معاكى جدا ...طاقه الحب والمشاعر إلى عندك هتخرج صح وهتتعلمى كتير اوووووى ٤ خدى كورسات في اى حاجه واشتغلي ع شخصيتك اكتر هتفرق معاكى جدا وكل ده هيكبر نظرتك لنفسك وتقدري تتكلمي مع الكبار عادى اصلا هما الي هيكونوا عايزين يسمعوكى لان عندك حاجه مختلفة وتجارب تستحق المشاركة واخيرا مفيش اي كلام هقوله انا او غيري هيغير وجه نظرك فجأة احنا بنحاول نقولك بعد آخر يمكن تكوني مش شيفاه بحكم الخبره الي عندنا القرار داخلي لازم يكون نابع من جواكي ومش معني انك حاولتي ومقدرتيش انه فعلا حب حقيقي ومشاعر صادقه لا خالص ده اسمه جهاد النفس لازم تحاولي مره واتنين و١٠ لان النفس اماره بالسوء وانتي عندك ميزه انك الحمد لله عارفه ان الي أنتي فيه ده سوء وابداي علاطول بلوك للكائن ده من كل طريق يقدر يوصلك منه وصلي واستغفري ربنا وانزلي من البيت كورسات بقي... أعمال تطوعيه... جيم... رسم.... موسيقي.... اى حاجه بس غيري شكل يومك العادي خصوصا الأوقات الي كنتي بتكلميه فيها ولو عندك المقدره انك تغيري موبيلك شكل غرفتك او المكان الي ديما كنتي بتقعدي تتكلمي معاه فيه يبقي احسن واحسن واخيرا تاني 😀 استعيني بالله وبلاش تضيعي مجهود اهلك الي عاشوا ١٧ سنه بيحاولوا يحموكي من شياطين الانس انتي تستحقي الأحسن من كده بمراحل 🤩

السلام عليكم ورحمة الله وبركاته اولا استعيني بالله وصلي وقربي من ربنا ربنا خلقك لسبب ولسه عايشه عشانه ممكن يكون اي حاجه ده دورك انك تكتشفيه ثانيا حتي لو محدش بيهتم بيكي كفايه أن ربنا محوطك باهتمامه وموفرلك البيت والاكل والشرب الحمد لله انتي معجزة ربنا في الأرض ويمكن الاحساس الي عندك ده عشان ربنا عايزك تقفي بين ايديه وتقولي يارب ثالثا اعملي اي عمل تطوعي مع اطفال يفضل لان عندهم برأه وقدره ع تجديد الطاقة بشكل غريب رابعا اشتغلي اي شغل مش مهم في البدايه يبقي ايه بس حطي نفسك في اي مسئوليه عشان تبدأي تحسي بقيمتك في الحياه وانك فارقة و واحده واحده ثقتك هترجع في نفسك المهم في كل ده انك لازم تبدأي ودوسي ع نفسك حتي لو مش حاسه بحاجه وانتي بتعملي الحاجه دي افضلي كملي فيها واحده واحده نظرتك لنفسك هتتغير وتذكري ان الحياه دار شقاء واختبار وربنا يعينك علي نفسك

السلام عليكم ورحمة الله وبركاته مبدأيا مش عارفة اديكي نصيحه مظبوطه اوى لان في تفاصيل كتير مش واضحه زي انتي بنت ولا ولد عندك مسؤوليات اد ايه عندك كام سنه متزوجه ولا لا تعليمك ايه كل ده هيفرق في النصيحه بس بشكل عام البلد كلها وضعها صعب انتي مش لوحدك فرويدا رويدا ع نفسك 1_لو عندك المقدرة انك تاخدي كورس او تتعلمي لغة ده هيفيدك اوى ويخليكى تشتغلي بمرتب كويس جدا 2_او التجارة اشتغلي سيلز في اى مكان وكل ما تبيعي اكتر دخلك يزيد 3_عندك اى موهبه في شئ استغليها مهما كانت بسيطة وقبل كل ده استعيني بالله واخلصي النيه لله وهتفرج بإذن الله وعندما استحكمت حلقاتها فرجت وكنت اظن انها لن تفرج وتذكرى قول الله عز وجل (فان مع العسر يسرا ان مع العسر يسرا)

من سؤالك أرجح ان سنك صغير عموما لو انا صح .. احب اقولك ياما هتشوفي يا بنتي 😀 بصي بقي الالم والاذي والحزن واي مشاعر سلبيه زي كده للاسف مش بتتنسي يعني مفيش زرار هندوس عليه هننسي كل حاجه الموضوع بيتم ازاي هو عامل زي الكوبايه المليانه عشان نشيل منها القديم بنضيف عليه جديد وكل ما تضيفي حاجات حلوة في حياتك اكتر كل ما القديم بيصغر في نظرك ويقل نصيحه ركزي علي علاقتك بربنا هتحسي انك مكتفيه بيه وهتحتسبي كل الاذي والألم عند ربنا ركزي في دراستك ولو خلصتيها خدي كورسات واتعلمي حاجه جديده اشتغلي كتير اووووووووى الشغل بينقل الانسان لحته تانيه خالص من تفكيره وهيخليكي تكتشفي حاجات جديده في نفسك وفي الناس وهتاخدي مناعه كويسه اوووووووى من كم الاسافين الي هتشوفيها في الشغل 😀 اعملي حاجه تطوعيه ودي صدقيني عالم تاني خالص واخيرا تذكري ان الحياه دار شقاء وفانيه

كل الإجابات الي اتقالت ممتازة بجد واسمعي نصايحهم معلومه ع الماشي كده الراجل بيحب يحس انه دايما مرغوب فيه بعض الرجال بتزهق من الست خصوصا لو اتجوزها (بقت مضمونة) دورى ع الي يراعي ربنا فيكي والي يراعي ربنا بجد مش هيعمل كده

بس كده ده جانب واحد من المشكلة محتاجين الجانب الاخر يعني لما بيقعد يتكلم معاها بترد بايه؟ اصل بالمنطق كده مفيش ست بتحب الاهمال واللامبالاه بس انتي قلتي معلومة مفيده ان عندها اربع اطفال وهل بتشتغل ولا لا وفي حد بيساعدها في البيت ولا لا حتي لو مش بتشتغل كفايه الاطفال وتفاصيلهم واحتياجتهم الزوجه اخر اليوم بتكون منهكه من كميه الزن والعياط والصريخ والطلبات الي مش بتخلص من الاطفال وبعض الأزواج للاسف بيرجعوا البيت مش شايفين غير الاكل جاهز ولا لا البيت رايق ولا لا الاطفال كويسين وشبعانين ونضاف ومذاكرين ولا لا وعايز زوجه فاضيه ليه هل هو بيساعدها او بيجيب حد يساعدها؟ وبالنسبه لأنها عايزه فلوس وخلاص لو الموضوع ده من بدايه معرفته بيها وهي عايزه فلوس وخلاص تبقي طماعه بس لو الموضوع ده من بعد الخلفة فاحب اقولك انها بمنتهي البساطه فقدت الأمل في زوجها وهي كمان حاسه بالاهمال وانها مش كفايه بالنسبه ليه ومبقتش شايفه غير ال٤ اطفال وعايزه فلوس عشان تربي وتعلم وتعالج وتجيب لعبه وكتاب و دوا ايه المتوقع من الزوج؟ انه يصرف ع بيته وايه المتوقع من الزوجه؟ يفضل انها تشتغل عشان تساعد جوزها وبيتها تحافظ ع البيت غسيل ومسح وطبيخ ونضافة كل شئ وتهتم بنفسها وتهتم بجوزها وتخلف وتربي وتهتم باولادها وتعلمهم وصحتهم للاسف ناس كتير بتفكر كده ويزعلوا لو الست قصرت لو خالك بيفكر كده انصحيه باعاده التفكير ورفقا بالقوارير

السلام عليكم ورحمة الله وبركاته بص يا محمد الموضوع مختلف من مكان لمكان ومن مدينه لمدينه جوه مصر نفسها وانك تحكم علي حاجه زي كده من بلدان تانيه تبقي بتشتت نفسك الموضوع مرتبط بالعرف الموجود بكل منطقة في مصر وكلهم مختلفين بس الاكيد ان ده بيتم بالاتفاق بين الطرفين و زي ما الراجل بياخد البنت من بيت أهلها معززه مكرمه تشاركه الحياه كلها بكل تفاصيلها وتتخلي عن كل شئ عشان الأسرة وعشان الزوج يبني نفسه وأسرته علي الاقل يكون في حاجه تضمن لها حياه كريمه لو الراجل قرر في لحظة ان يقولها شكرا خدمتك انتهت معانا (واسفه ع التعبير ده بس للاسف في ناس بتفكر وبتعمل كده) النصيحه الي اقدر اقدمهالك انك تختار كويس من بيت أصيل وتربيه معتدله عشان مينفعش تبقي داخل الجوازة وانت متخيل انها هترفع قضيه وتبدد العفش خالي كل حاجه بالمعروف في رجاله بتكتب قايمه ولما تيجي تطلق بتخلي الست تتنازل عن كل شئ ويبهدلوا الستات حرفيا وفي جوازات من غير قايمه والناس عايشه ومبسوطه والست بتضحي بكل شئ في سبيل سعاده واستقرار بيتها ومش خايفه من جوزها ولا حاجه ولو حصل طلاق بيشلها فوق دماغه ويديها اكتر من حقها الفرق بين المثال ده والي قبله التربيه وحسن المعاشره خد بنت من بيت أصيل وعاشرها بالمعروف

استعيني بالله وصلي كتير متفوتيش فرض اشتكي واحكي لربنا واقراي قرآن هتلاقي كل الإجابات بلاش تعتمدي علي حد وابني نفسك بنفسك ده الي بيفضل موجود مش الأشخاص وصدقيني لما تدوري علي نفسك هتلاقي مليون شخص في طريقك نفسه يكون جمبك في طريقك

الصداقة شئ جميل جدا ومهم خصوصا في فترة المراهقة لانه بدايه التعرف ع العالم الخارجي ... واول العلاقات الاجتماعية الي بنكونها بره البيت ... بس يا عزيزتي ممكن تقوليلي ايه تعريف الصداقة من وجهه نظرك؟

في لزقه شديده اوى بتاع فئران هاتها وحطي عليها لانشون في دقايق هتلاقيه ع اللزقه

كفيت و وفيت

ونتذكر قول الله عز وجل لعل الله يحدث بعد ذلك امرا

ويمكن لما يتغير معاها هي كمان تتغير

طالما دي تربيتها يبقي مش هتتغير بالكلام وسنها كبر اصلا واكيد صحتها وطاقتها مش زي الاول .... يمكن يجرب يجيب حد ينضف مره او مرتين في الأسبوع وفي ستات كتير كده ع فكره لا بتنضف ولا حتي بتطبخ هي بتربي وتاخد بالها من نفسها وجوزها ..... خاليه يجرب يرجع البيت ويغير معاملته معاها ويحاول بشوف الجانب الحلو الي فيها اكيد فيها ميزه ولو واحده بس كفايه انها ربت وعلمت الاولاد ....