السلام عليكم
عايزة استشيركم في جوازة أنا مقبلة عليها لو سمحت ياريت أهل الخبرة تفيدني، أنا بابا متوفي وعايزة أطمن إن هل أنا ماشية صح ولا لا وجزاكم الله كل خير
دلوقتي أنا متقدملي عريس مهندس وشغله في السعودية
عنده شقة لسه بتبني في التجمع الخامس وهتتسلم بعد سنة ونص، وعليها أقساط لسه بعد التسليم حوالي ٤ سنين
هما قالوا هنجيب دهب حاجة بسيطة ب ٧٠ ألف وهي دي الشبكة، والشقة مش هيفرشوها كلها هيفرشوا اوضتين بس وهيسيبوا اوضة، والفرح نص بالنص يعني احنا هندفع معاهم فيه، + هيبقا عليا الأجهزة الكهربائية والسجاد والستاير والمطبخ بأدواته "ودي حاجات بمبالغ كبيرة اوي" فعلى أقل مفروض الشقة تتفرش كلها
الولد أخلاقه كويسة ومتربي وفي كل صفات الي أنا عايزها، بس هل شايفين هل أنا مظلومة في جوزاة دي ولا لا
أهلي شايفين إن لازم الشقة تتفرش كلها وهو يبقا عليه السجاد والفرح، والشبكة المبلغ يتزود شوية
عايزة اسمع لو سمحت آراكم
السلام عليكم، بصي أنا مش هقدر أحكم على حالتك بالذات وكلام أهلك، لأن كل منطقة وعاداتها وحوار التجهيزات والعفش بيفرق من مكان للتاني في مصر، بس عامة مش لازم المبالغات في التجهيزات والفرح (زي ما بيحصل حاليا) يعني حوار ٥٠ ملاية و١٠٠ فوطة وكم شاشة كبيرة ومعرفش إيه وكل ده بلاش منه حتى لو الناس هتتكلم، محدش له حاجة عندك. ثانيا، لو حاجة هتحسي إنها ضغط عليكِ اتكلمي بصراحة واسألي البنات في جروبات الفيسبوك هتلاقي تجارب تفيدك أكتر في الجزئية دي بس ابعدي طبعا عن المبالغات زي ما قلت. *** هرد على نقطة سألتِها في أحد التعليقات فوق، وهي بخصوص مسألة يقلل من قيمتك لو تساهلت. النفطة دي هتكون على حسب الشخص والأسرة اللي هتتزوجي فيها... للأسف حصل مع بنات كتييير لما تساهلوا في المهر والمفروض على الزوج وقالوا تيسير وبنشتري راجل والكلام ده، إن الزوج وأهله بعد كده استهانوا بها وعايروها، فيه اللي بيقول أهلك باعوكِ بالرخيص وفيه اللي بيقول أهلك ما صدقوا خلصوا منك وفيه اللي قالوا معيوبة وأكيد في مشكلة عشان كده بتتنازل وفيه اللي بيقول دي جوازة البايرة وهكذا... مش عاوزة أكون محبطة ومتشائمة، أكيد فيه شباب محترمين هم وأهلهم بيقدروا ده، لكن بنقل لك بالحرف كلام البنات اللي حصل معهم كده وكلام تعليقات لشباب أنا قرأتها لما البنات بتقول الوالد تنازل عن كذا وكذا.. الشباب بينادوا بالتيسير ومتصعبوش الزواج وأيسرهن مهرا وكل ده بس الواقع بيقول إن الرجل مبيقدرش الحاجة اللي مش بيتعب ويعافر عشان يوصل لها. ** أنتِ صلي استخارة أهم حاجة، خلي ناس موثوقة تسأل عن العريس وأهله كويس. لا تتنازلي عن حاجات من حقك، الناس مش بتقدر اللي بيتهاون في حقه واللي مش بيقدر نفسه.. قولي لأ عادي لأي طلبات فوق طاقتك. متخليش فترة الخطوبة قصيرة وادرسي الشخص كويس. وإن شاء الله ربنا يعمل لك اللي فيه الخير.
تم النشر الأحد، ١٧ مايو ٢٠٢٦
بصي يا حبيبتي انا معنديش خبرة اوي في المواضيع دي بس انا لو مكانك مثلا هقوله مش مهم دهب هاتي مثلا دبله بس يعني وفري ف الشبكه واعملي بيها حاجه تانيه انا معرفش الاسعار ايه بس اعتقد هتساعد معاكم شويه وممكن الدهب تكتبيه ف القايمه جرامات يعني انا شخصيا بحس الدهب ملهوش لازمه ادام انتوا مرتاحين لبعض والفرح مثلا مش لازم قاعه كبيرة يعني اعتقد بفلوس الدهب ممكن تعملوا في قاعه مش كبيرة اوي بس هتبقي حلوة *يعني ده مجرد رأي والقرار النهائي ليكي ربنا يكرمك يارب ويوفقك للأفضل دايماً ❤️ *ومتنسيش تصلي صلاة استخارة لان احنا كلنا مجرد آراء وربنا هو القادر علي كل شئ وقادر ان الامور تتيسر
تم النشر الاثنين، ١٨ مايو ٢٠٢٦
سلام عليكم. فيه مرجعيتين في الأمر ده: الشرع، والعرف. الشرع بيقول إن كافة المصاريف بالكامل بتكون على الزوج، لكن طبعا بحسب قدرته. العرف اللي ماشي في مصر، على حد علمي، إن الزوج بيجيب الشقة وبعد كده كل حاجة النص بالنص. فمثلا العريس بيدفع مهر وشبكة ثم العروسة تفرش. لو حاولنا نجمع بين الاتنين بالمعروف، يبقى ممكن نعرف من الزوج هو قدراته إيه بالظبط، ثم إما نقبل بيها زي ما هي ونتجوز حتى في غرفة واحدة بس مفروشة ومنغير فرح، وإما ندفع إحنا الحاجات الناقصة اللي شايفين إننا مينفعش نتجوز منغيرها. وأخيرا في رأيي الشخصي المتواضع، حسب كلام حضرتك، التقسيمة تعتبر عادلة وجميلة طالما القبول وحسن النية متوفر. ولو حضرتك خايفة من هاجس إنك تتظلمي، تقدري تمتنعي عن المشاركة بأي مبلغ، بس تتقبلي الميزانية اللي هو يقدر عليها بالشكل اللي أنا وصفته. كمان لو انتو هتعيشوا في السعودية وتنزلوا مصر إجازات، فده هيديكم فرصة حلوة جدا إن شقتكم تجهزوها براحتكم خالص كل ما يتوفر مبلغ مش لازم أبدا تجهز دلوقتي.
تم النشر الأحد، ١٧ مايو ٢٠٢٦
وعليكم السلام ورحمة الله، يا قمر. أولاً، ربنا يرحم والدك ويوسع له في قبره، ويبارك لك في الخطوة دي ويوفقك للأفضل. الموضوع ده مش "ظلم" بالضبط، لكنه غير متوازن شوية حسب العرف السائد دلوقتي. الراجل بيشتغل في السعودية ومعاه شقة، وده حاجة كويسة، لكن تحميلك أنتِ بشراء الأجهزة والسجاد والمطبخ كامل (وهم حاجات غالية) وهم بيفرشوا أوضتين بس.. ده بيخلّي العبء عليكِ أكتر من اللازم، خاصة إن الشبكة ٧٠ ألف بس. في الزمن ده، أغلب العرايس بيطلبوا الشقة تكون جاهزة للسكن (مفروشة كاملة أو على الأقل الأساسيات)، والشبكة تكون أعلى، والفرح يتقسم أو يتحمل الراجل الجزء الأكبر. أهلك شايفين الصورة دي صح، وده مش جشع، ده حماية ليكِ. نصيحتي العملية: اتكلمي معاه بهدوء وقولي له إنكِ خايفة من التكاليف دي وإنكِ عايزة الشقة تكون مريحة من أول يوم. لو هو فعلاً متربي وأخلاقه كويسة زي ما قلتِ، هيقدر يتفهم ويحاول يحسن العرض (يزود الشبكة أو يفرش أكتر). لو رفض أو قال "مش قادر"، يبقى لازم تفكري كويس: هل هتقدري تتحملي التكاليف دي فعلاً ولا هتبقي متوترة من أول الجواز؟ الجواز مش بس "صفات كويسة"، لازم يكون فيه راحة مادية كمان عشان الجواز يستمر بهدوء. لو عايزة تسمعي آراء أكتر، ادخلي على فدني وابحثي عن أسئلة مشابهة، أو روحي لصفحة الخبراء هناك: https://www.fedni.net/experts واستشيري مستشارة زواج. ربنا يختار لكِ الخير ويطمن قلبك. لو حابة تكملي الحوار قوليلي. 🤍
تم النشر السبت، ١٦ مايو ٢٠٢٦
هوا حالته المادية تجبره إنه يتجوز بالتفاصيل دى " ايسركن مؤنة أكثرن بركة ، والجواز مسؤلية مشتركة إن ارتضى الأطراف كلها ، بس ف حاجات هوا مش قادر يعملها ودا شيء لا يعاب عليه ، لاكن من نفس المنطلق انتى كمان ف حاجات مش قادره تعمليها قولى كده ودا حقك ولا تلامى عليه ، مدام ارتضينا نقتسم الأمور فيما بيننا يبقى بالتيسير لكلا الطرفين مش طرف ااه والتانى ندبحه انتى راعيتى ظروفه المفروض هوا وأهله يراعه ظروفك ، ومن الحكمة اقساط الشقة ف التجمع غاليه جدا كن ممكن نشوف حتى درجة أقل نبدأ بيها حياتنا وبعدين ربنا هيبارك إن شاء الله ، ممكن منعملش الفرح الواو وتكمل ونفرش بيها باقى الشقه ، هنكون ضد العرف فيما يرضى الله يبقى نكمل على المبدأ ، وأخيراً خذوهم فقراء يغنهم الله
تم النشر السبت، ١٦ مايو ٢٠٢٦
هلق انا مافي عندي ثقافه في هاد الموضوع ابدا بس رح ابدي رأيي اذا الشب فيه كل الصفات الي بدك اياها محترم واخلاق اهم شي خلي اهلك يسألو عنه في منطقته في كتير ناس تبين منيحه وبعدين تطلع لا إذا متل ما عم تقولي وشايفه نفسك مظلومه حتى لو دفعتي بعد مده رح تتم حسره في قلبك لهيك احكي معه اني مش عليا العفش كامل وحاسه نفسي مظلومه وإذا اساسا صار يحكي وما رضي معناته مو متل ما عم تفكري فيه وبكون ظهر على حقيقته انه بخيل والله اعلم من كلامك يشتغل بالسعوديه وضعه احسن من نص الشعب المصري وعم يدور يتزوج اقل منهم مثال من شغلت شهرين خطبنا لابن عمي طبعا شب ما معه كتير مصاري بالأخير اتفقو مهر 100000 ليره تركيه ابن عمي ولو ما معه مصاري زاد من عنده عشرين الف وقال قليل ميه هون بين انو انسان بيقدر مش مستهتر او بخيل شوفي لما بيجي لعندكم هل بجيب هدايا ولا لا مش عطر ولا بس شوكلاطه حلو شي بسيط نوع انواع فواكه شي بسيط يعني إذا ما عم يعمل هيك شي ولله اعلم هاد انسان بخيل الرجل البخيل ابشع رجل ممكن تعيشي معاه رح يقرفك حالك بالفقر وبعد ما يموت بتشوفي عنده ثروه بعرف طولت عليكي بس عم حاول اعطيك نصيحه بالثقافه الخفيفه بهاد الموضوع الي عندي
تم النشر الاثنين، ١٨ مايو ٢٠٢٦
الحاجات اللي شايفة انها فوق طاقتك قولي انها فوق طاقتك، مش لازم تبدأوا حياتكم من حيث انتهى الآخرون، بل ان مش من المنطقي انكم تبدأوها من حيث انتهى الآخرون، حاولوا توسطنوا الأمور بحيث ان محدش يحس انه اتضغط اكثر من اللازم، وفي الآخر كل اللي هتجيبيه اكتبيه في قايمة، لإن ده كله حقك
تم النشر السبت، ١٦ مايو ٢٠٢٦
أما والدك ف ربنا يرحمه ويسكنه فسيح جناته ويجمعك به في الجنة ف هو ولى ذلك والقادر عليه ، بس هو دا يكون هادد حيلك ومأثر على قراراتك ، لو شايفه إن ليكى حق ف اى حاجة متفرطيش فيه أنت ست العرايس
تم النشر السبت، ١٦ مايو ٢٠٢٦
ال مش قادره عليه قولى زى ما هوا قال طالما هنقتسم المسؤوليه
تم النشر السبت، ١٦ مايو ٢٠٢٦
يعني حضرتك شايف إن نطالب بأيه بظبط بحيث ولا اظلمه ولا يظلمني انا كمان والدي متوفي والنقطة دي عملالي قلق بسبب خايفة اتظلم او حقي يضيع
تم النشر السبت، ١٦ مايو ٢٠٢٦
لعرض السؤال في فدني اضغط هنا