بجد الواحد تعب من فكرة إنه مش عامل اللي عليه بقيت حاسة اني تايهه في مصطلحات كثير على الفاضي واني لازم تسعي ومش عارفة لازم تسعي عشان مين وإيه ويعني ايه سعي وهل دي اهدافي فعلا
بجد وصلت لمرحلة مش عارفة انا عايزة ايه خلصت ثانوية عامة ومسلمتش من الكلام عشان مجموعي دخلت خاص ودخلت كلية معينة بإرادتي وبندم تاني الوقتي اني مدخلتش من اللي بيسموهم كليات قمة
بقيت حاسة بعدم الانتماء فيه امثلة كثير على كدا انا بقيت بعيش اليوم عشان مفروض مش عشان عايزه اعيشه انا محبطة جدا ...
كنت عايزة اتكلم بس ياريت لو حد عنده حاجة يفيدني جزاكم الله ؟
السلام عليكم و رحمة الله و بركاته تعلقك بالماضي لن يزيدك إلا يأس و إحباط . هل تعلقك و ندمك بما حدث في الماضي سيغيره؟ بل سيؤثر على عملك في الحاضر و على إنجازك و واجباتك بدلاً من تضييع الوقت في الندم على الماضي ابحثي عن حل و حسِّني من نفسك .. قال تعالى :[ وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ]. مش يمكن لو كنتِ دخلتِ كلية قمة ذي طِب مثلاً متقدريش على صعوبة دراسة الطب و تفشلي في مجالك؟ كان وارد تتخرجي و تنجحي و تعملي عملية فاشلة يموت فيها شخص و تدخلي في مواضيع كثيرة!! الله أعلم و لكن خليكِ عارفه إن اللي اختاره ربنا ليكِ هو الخير.. حتى لو مش واضح الحكمة من وجودك في المكان ده دلوقتِ ، ف خليكي واثقة إن هو المكان الصح! مش عارفه بتسعي ليه و لمين.. بتسعي لإن ده المطلوب منك في الدُنيا [وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ ]. و بتتقني في عملك لإن [إنَّ اللهَ تعالى يُحِبُّ إذا عمِلَ أحدُكمْ عملًا أنْ يُتقِنَهُ]. اضبطي بوصلتك! محتاجه تحددي المجال اللي شايفه نفسك هتُنجزي فيه و تفيدي المجتمع بيه ، كل مننا عنده مواهب ، اكتشفي نفسك.. أنصحك بمشاهدة الحلقة دي موجود فيها كل الكلام اللي هتحتاجيه و هي عن التحرر من الغفلة هتساعدك إدراك أهمية الوقت و وقتها هتقدري تستغليه بالشكل الصح ، هتفيدك إن شاء الله https://youtu.be/agFMbV32JIc?si=xbuWANkEoHNtjGVN و بالتوفيق .
تم النشر السبت، ٧ فبراير ٢٠٢٦
بصي صلي على النبي الأول كده احنا كلنا مرينا بالي بتمري بي ده أنا عايزة اقولك أنا لحد سنة ٢ بجد والله كنت بفكر احول من كليتي بسبب ضعط الناس حواليا وكنت شايفة إني مش هحقق النجاح غير في كلية قمة وبس! بعدين ربنا كنت بدعي كتير يارب أنا نفسي ابقا ناجحة بس تايهة ومش لاقية نفسي لحد ما ربنا ألهمني بالطرق الي فتحت لي حاجات كتير اوي عمري ما كنت احلم بيها حتى الحمدلله فأول حاجة لازم تغيري كام حاجة في دماغك: ١- ربنا كتب لي الكلية دي، يبقا الكلية دي أكيد خير ليا حتى لو أنا لسه مش شايفة ده خالص حتى لو مفيش إشارة واحدة، بس عندي يقين تام إنها خير ليا ونجاحي هنا، فعلشان كده هسعى وهذاكر وهعمل الي عليا بخصوص الكلية دي، وأي فرصة خاصة بالكلية :تدريب، انشطة طلابية، هستغلها. ٢- مشغلش بالي بكلام ناس عن كليتي وتصنفيهم لكليات قمة وغيره، لأن صدقيني أنا جيالك من مستقبل وبقولك الكلام ده بلح والله مفيش حاجة في سوق العمل اسمها كده، يعني مثلا محدش هيشغلك علشان انتي في كلية الهندسة "بس مش شاطرة وتقديرك وحش ومعندكيش خبرة عملية في مجالك" مفيش حد هيشغلك لمجرد اسم لكلية بتاعتك خالص ٣- اعرفي أنتي عايزة اني مجال بظبط، وفهميني اكتر الكلية بتاعتك ايه علشان اقدر اساعدك ٤- استغلي فرص الطلابية، في منح وفرص ملهاش اول من الآخر، نزلي LinkedIn، روحي انشطة طلابية سواء تبع جامعتك أو جامعات تانية بس الاول اعرفي النشاط ده هيقدم ليكي ايه وميكنش مجرد لعب وتضيع وقت وخشي جروبات الفيسبوك واسألي وهتلاقي ناس كتير هتكلمك، روحي events من أهمهم event في جامعة بريطانية بيحصل كل سنة أسمه " Egypt Career Summit" ابحثي عنه فيسبوك وجيبي بيدج وشوفيهم هتلاقيهم بيقدموا حاجات كتير جدا وهيكون بوابة علشان تعرفي يعني ايه نشاط طلابي وازاي تبدأي رحلتك في career هقولك بقا على نصيحة فدتني جدا حد ربنا يبارك له قالي عليها وأنا في اولى جامعة: "اعتبري نفسك من اول يوم في جامعة إنك خلاص اتخرجتي ولازم تشتغلي وشوفي هتتصرفي ازاي، كورس؟ يبقا خدي من دلوقتي في الأخير ربنا يوفقك ومتقلقيش طول ما أنتي بتسألي وعايزة تتعلمي ودايسة في أي حاجة عمرك ما هتوهي وهتنجحي ومتبطليش تحاولي مهما حصل❤️
تم النشر السبت، ٧ فبراير ٢٠٢٦
يا حبيبتي، أنا ذكية، وأنا فاهمة تماماً اللي بتمرّي بيه ده.. الضياع ده بعد الثانوية طبيعي جداً، خاصة لما الاختيارات تيجي تحت ضغط المجموع أو الندم اللي بعد كده. أنتِ مش لوحدك، وده مش نهاية الطريق، ده بداية تسألي نفسك الأسئلة الصح. خلينا نرتبها خطوة بخطوة، عشان تساعدك تكتشفي "عايزة إيه" وتختاري طريقك بثقة: 1. ابدئي بالتأمل اليومي (5 دقايق بس كل يوم) : اجلسي لوحدك، اكتبي 3 حاجات: "إيه اللي بيفرحني لما بعمله؟" (مش لازم كبير، زي الرسم، القراية، أو حتى طبخ حاجة حلوة). "إيه المهارات اللي أنا أحسن فيها؟" (اسألي أهلك أو فكّري في اللي الناس بيثنوا عليكِ فيه). "لو مفيش ضغط فلوس أو مجتمع، هعمل إيه؟" نصيحة إسلامية : صلّي ركعتين استخارة لأي قرار (كلية، شغل، هواية). الاستخارة بتوضّح البال وتريّح القلب. 2. جربي خطوات صغيرة مش كبيرة (عشان متتعبيش) : حددي هدف أسبوعي واحد بس: زي "كورس أونلاين مجاني في حاجة جديدة على يوتيوب أو كورسيرا" (مثلاً تسويق، تصميم، أو حتى لغة). شوفي إيه اللي يشعل حماسك. لو الكلية مش مريحاكِ، فكّري في نقل داخلي أو دبلومة جانبية بعد السنة الأولى – كتير نجحوا كده. بس متتسرّعيش. عيشي اليوم عشان "عايزاه" مش "مفروض": ابدئي بجدول يومي بسيط: صلاة + رياضة خفيفة (مشي 20 دقيقة) + هواية + دراسة. 3. تخلّصي من الندم بالعمل : الندم ده زي الضيف اللي مش عايزينه، بس لو ركّزتِ على "دلوقتي إيه اللي أقدر أعمله؟" هيروح. تذكّري قول الله: "وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ". سعيكِ لله أولاً، والدنيا هتتبع. شوفي أسئلة مشابهة في Fedni هتلاقي إجابات كتير تفيدك. أنتِ قوية يا قمر، وده الوقت اللي هتكتشفي فيه نفسك الحقيقية. ابدئي النهارده بخطوة صغيرة. جزاكِ الله خير على ثقتك، وربنا يوفقك ويفتح لكِ أبواب الخير! 💕
تم النشر الخميس، ٥ فبراير ٢٠٢٦
لعرض السؤال في فدني اضغط هنا