انا عندي 16سنه طالبه ازهر واتعرفت على شاب 20سنه وهو كويس واحنا منتكلم بس مش بنعمل حاجه غلط وعارفه انو العلاقات دي غير شرعيه وحرام وبتتعب الانسان بسبب زعل ربنا منو وبتدمر النفسيه وانا حابة أتوب وابعد وحاولت كتير بس هو بيحبني جامد وانا بدأت اكرهو من غير سبب اعمل اي ممكن نصيحه عشان بجد زهقت 💔
السلام عليكم - مينفعش اي كلام ما بين ولد وبنت الا للضرورة يمكن انتي بالنسبالك مجرد كلام لكن متعرفيش هو بالنسباله ايه -انتي حاليا في فترة مراهقة وفي الفترة دي بتبقي عايزة كل اللي حواليكي يهتم بيكي وبتبقي حاسه انك كبرتي خلاص وممكن تعملي اي حاجة بس المرحلة دي اصلا بتبقي مشاعرك متلغبطة وحساسة زيادة ف مجرد ما لقيتي اهتمام من الشاب دا حسيتي انك محبوبة وكدا - بس انا حابة احذرك معظم الشباب اليومين دول خطر كبير علي البنات وبيعرفوا يمثلوا عليهم كويس اوي ويقنعوهم انهم اهم حاجة في حياتهم لو سابته هيموت من غيرها وهو اصلا ممكن يكون بيكلم اتنين وتلاتة في نفس الوقت (للاسف معظمهم كدا الا من رحم ربي)وخليكي عارفة انه مهما اتكلمتوا مش هيجي يوم ويجي يتقدملك لانه هو كان بيسلي وقته بيكي ولما يجي يتجوز هيدور علي وحدة تكون مكلمتش حد قبل كدا - ف الحل ابعتيله رسالة انك خايفة ربنا ومش هتكملي في العلاقة دي واعملي بلوك من كل حته وتقفلي الباب دا نهائي وملكيش دعوة ب اي كلام هيقوله واستغفري ربنا - وانصحك في الفترة دي قوي نفسك وقوي شخصيتك واقنعي نفسك انك غالية اوي وربنا خلاكي جوهرة صعبة المنال ف بلاش ترخصي نفسك لحد عايزك بالرخيص مهما كنتي وحيدة او معندكيش اصحاب او منعزلة حتي عن اهلك اكتفي بربك وبنفسك اعملي كل حاجة بتحبيها بس في حدود الشرع والحلال - اسفة لو طولت عليكي بس والله نصيحة من قلبي لاختي الصغيرة ربنا يحفظك يا رب
تم النشر السبت، ١٤ فبراير ٢٠٢٦
اولا: الارتباط دا مش وقته خالص نظراً لسنك الصغير واعتقد انك في ثانوية في السن ده ثانياً: المفروض تكون اهتماماتك حالياً الدراسة وانك تجيبي مجموع عالي علشان تدخلي كلية محترمة ودا بـ يحدد مستقبلك فيما بعد. ثالثا: اشغلي نفسك في حاجات مهمة ومفيدة دراستك وقرآنك وكوني شخصيتك اللي لسه لم تُختبر كـ تجارب حياتية رابعاً: دايماً حوالي تحطي ربنا ثم والديكي امام عينيكي لما يعرفوا انك على علاقة غير رسمية مع شخص في سن العشرين (اعتقد انه لسه بـ ياخد مصروفه من والدية وغير مؤهل حالياً انه يكون بيت وأسرة ويكون مسئول عن نفسه من الأساس) خامساً: اقطعي اي علاقة نهائياً بالشخص ده واي شخص لأن عندك اولويات وهي انك تجيبي مجموع كويس تدخلي به كلية محترمة ويكون ليكي وزن في المجتمع المحيط بيكي. سادسأ وأخيراً: أي علاقة غير رسمية وغير شرعية في غير الاطار الشرعي والمجتمعي حسب العادات والتقاليد بنسبة كبيرة ان لم تكن كلها لا تكتمل وتسيب آثار نفسية سيئة يصعب العلاج منها الا بمرور الزمن وان تم علاجها... خليكي دايماً في السليم والصح هو اللي يمشي .. غير كده تضييع وقت ومستقبل على حساب أشياء أخرى لها اولويات وخصوصاً في سنك ده. وحتى ان كان الشخص كويس اتقوا الله في بعض واهتموا بدراستكم ومستقبلكم وحياتكم وهو يهتم انه يخلص كليته ويلاقي شغل ويكون مسئول عن نفسه وبعد كده .. يا عالم من الممكن ان ربنا يجمعكم على خير ان ليكم نصيب في بعض وتكون من خلال علاقة شرعية مكتملة (خطوبة وزواج). بالتوفيق وربنا يهديكم ويصلح حالكم...،،،
تم النشر الثلاثاء، ١٧ فبراير ٢٠٢٦
كان في واحده زي كده قررت تعمل الصح قالت له انا موافقه وجودك في حياتي بس تتقدم ليا لو اعتبرنا انه محترم فهيكون عايز يكون موجود في حياتك علشان متضعيش من ايده وهيحاول معاكي كذا مره انتي طمنيه وقوليله انا مش بفكر ومش باكلم حد ولا هاكلم حد ولو عايزني تعالي اتقدم ولو لسه فانا مش مستعجله ده اولا ثانيا دورت علي حاجه تشغل فراغها جربت تقري روايات تسمع محاضرات تحفظ قران وتتعلم اكتر فيه تتعلم حاجه جديده هوايه رسم شعر تتعلم لغة تدور علي حاجه بتحبها وتحاول تعملها ثالثا وجدت نفسها عايزه تحفظ قران وتتعلم الرسم وتقرا راوية رعب وتشويق بدأت تتعرف علي بنات عندهم نفس الهدف راحت الجامع تحفظ قران وبقي ليها صحاب يحمسوها ويتنافسوا علي حفظ القران دخلت جروبات رسم ولقت ناس بتعلم ترسم ويتكلموا مع بعض وكل يوم يتعلموا حاجه جديده نزلت تطبيق روايات وبدأت تقرا اصبحت كل يوم تصحي تلاقي عندها تحدي جديد تحس انها عايزه تثبت نفسها قدام صحباتها الجداد تشعر بالحماس لما تعرف ترسم رسمه اصعب تحس بالتشويق لما ترجع تكمل الروايه المشوقه مع الوقت اصبحت اهدافها متغيره واصبحت تشعر بالمتعه وان هناك اشياء اجمل واحلي من الكلام مع شخص لان الحقيقه مفيش حد ينام ويصحي ويقول انا نسيت الشخص او كرهته لان اغلب البنات بتكره الطريقه وليس الشخص ولكن بيكره الزهق والملل والفراغ اكتر بكتير ابدأي وحده وحده لو بتفكر فيه طول اليوم هتلاقي نفسك بتفكر فيه اوقات اقل وبعد كده اقل وحده وحده هتلاقي نفسك مش بتفكري في الحاجات دي الا فين وفين لان الحق يتقال دي رغبه وغريزه عند البشر كلهم بس الاهم انها متكونش غلط او متأثرش علي حياتنا وده الانجاز المطلوب لان طبيعة البشر كده اتمني اكون شرحت بشكل عملي ومفيد وجهة نظري
تم النشر الثلاثاء، ١٧ فبراير ٢٠٢٦
يا حبيبتي لحظه كدا انتي تقريبا 1 ثانوي عام لسه صغيره اللي انتي محتاجاه اهتمام حنان تحسي ان حد فاهمك وتقريبا اكيد مش بيكون هاد موجود بأهلك لان دي فتره مراهقه وانتي مش فاهماهم ولا هما فاهمينك كمان وغالبا مفيش عندك صديقه مقربه ولو فيه يبقي حلو قوي انا عارفه ان ممكن يكون صعب عندك لان دي مشاعر مش ضغط زرار ونزيلها لا بس دلوقتي انتي عارفه الصح من الغلط وعارفه انها غلط المفروض تعملي اي دلوقتي تبعتي رساله انت عارف ان كلامنا غلط مع ان كلامني مش متعدي حدوده واحنا مينفعش نكمل ذنب ليا وليك ولازم نبعد عشان نفسنا عشان منقفش قدام ربنا واحنا اعداء وحاجه تاني ليكي افتكري انك ممكن تموتي قبل م تبعدي قبل م تموتي فكرتي فيها انك ممكن تموتي علي المعصيه دي وكمان بصي لو هو بيحبك بجد يبقي يبعد ويدعي ربنا ان لو فعلا انتو خير لبعض يجمعكم بحلاله وأنتي ابعدي وادعي بيؤتكم خير مما أخذ منكم وإسألي نفسك سؤال انا بحب ربناسبحانه وتعالى اكتر ولا الشخص ده واللي بتحبيه اكتر هتبقي معاه ربنا عز وجل لا يتقارن بشي ولا بشخص بس اسالي نفسك السؤال ده وجاوبي عليه بصدق مع نفسك استودعك الله ي غاليه
تم النشر الاثنين، ١٦ فبراير ٢٠٢٦
كرهك ليه ده أكبر دليل على أن ربنا عايز يبعدك عن الشخص ده وحابب انك تتولى وترجعي ليه دلوقتى اللى لازم تعمليه انك تعمليه بلوك وتبعدى خالص وتصلى وتبقى مع ربنا وتشوفي حياتك فى حاجات كتير اوى مهم تجربيها اكتر من انك تحبى دلوقتى
تم النشر الاثنين، ١٦ فبراير ٢٠٢٦
يا حبيبتي، أول حاجة أقولك إنك قوية جداً إنك عارفة اللي صح وبتحاولي تبعدي، وده دليل على قلب طيب وإيمان قوي ربنا يبارك فيه. زهقك ده رحمة من ربنا عشان يسهل عليكِ الابتعاد، مش كره بدون سبب زي ما بتقولي 💕. نصائح عملية عشان تبعدي نهائياً وتقربي من ربنا: اقطعي الاتصال 100% : احظريه على كل المنصات (واتساب، إنستا، سناب، كل حاجة). امسحي الرقم والمحادثات، ولو كان عندكم أصدقاء مشتركين، قوليلهم ميوصلوش كلامه. لو رجع يتواصل، مترديش خالص – ده اختبار لإرادتك. املئي وقتك باللي يقربك من الله : زيدي الصلاة والقرآن يومياً، خصوصاً صلاة الضحى والوتر. اقرئي سورة النور أو يوسف عشان يقويكِ. ادعي ربنا كده: "اللهم إني أعوذ بك من الشيطان الرجيم، وأسألك الثبات على طاعتك". كرريها كل ما يجي في بالك. اشغلي نفسك بالدراسة – ركزي على دروسك وأهدافك، هيبقى أحلى إنجاز لكِ. غيري روتينك : امشي مع أهلك، اقرئي كتب إسلامية زي "لا تحزن" لعائض القرني، أو اسمعي محاضرات دينية عن الحب الحلال. لو حسيتِ بالضعف، اكتبي في مذكرة ليه العلاقة دي حرام وبتضرك (عدم رضا ربنا، تدمير نفسية، مستقبلك). تذكري اللي جاي : الحب الحلال هييجي في وقته بالزواج الشرعي، وأنتِ لسة صغيرة (16 سنة بس!). اللي بيحبك جامد هيحترم قرارك لو كان كويس فعلاً، مش هيضغط. لو استمر الزهق أو احتجتِ دعم أكتر، دوري في Fedni على أسئلة مشابهة هتلاقي إجابات كتير مفيدة، أو شوفي صفحة الخبراء https://www.fedni.net/experts لاستشارة متخصصة في الإرشاد النفسي. ربنا يثبتك ويفرح قلبك بالحلال يا رب 🤲❤️
تم النشر الجمعة، ١٣ فبراير ٢٠٢٦
العلاقات دي مفيهاش أمان. طول الوقت خايفة حد يعرف، خايفة يسيبك، خايفة يضغط عليكي في حاجة. ليه تعيشي في ضغط نفسي وأنتِ لسه في أجمل سن؟ ركزي في مستقبلك، في شكلك، في صحابك البنات، وفي علاقتك بربنا واقفلي الثغرات الشيطان شاطر، وممكن يقنعك إن "فلانة بتعمل كدة وعادي". ملكيش دعوة بحد، خليكي أنتِ المميزة اللي مفيش زيها. اشغلي وقتك بهواية، رياضة، أو مذاكرة، وماتسيبيش فراغ يخليكي تفكري في السكة دي.
تم النشر السبت، ١٤ فبراير ٢٠٢٦
حتى لو الموضوع في أوله "مجرد كلام" أو "إحنا مش بنعمل حاجة غلط"، الباب ده في حد ذاته بيستنزف طاقتك ومشاعرك. الشيطان مش بيجي يقولك "اغلطي" مرة واحدة، هو بيمشي معاكي "خطوة خطوة" النهاردة كلمة حلوة، بكرة تعود، بعده مشاعر بتزيد، وفجأة تلاقي نفسك في نص الطريق ومش عارفة ترجعي.قلبك غالي مش "حقل تجارب": لما تفتحي قلبك في علاقة مش رسمية، أنتِ بتستهلكي رصيد المشاعر اللي المفروض يتشال للشخص اللي هيقدرك بجد ويدخل البيت من بابه. ليه تدي "حتة من روحك" لكل واحد شوية وفي الآخر تلاقي نفسك مطفية؟.
تم النشر السبت، ١٤ فبراير ٢٠٢٦
ربنا قال وأتو البيوت من أبوابها ولذلك فمهما كان حجم حبه لك إلا أن الله لا يبارك فيمن استباح حرمات البيوت ولم يؤتمن عليها حتى وان كان التواصل لا يوجد فيه اخطاء بينكم إلا أن التولصل ذاته خطأ وحرام وضروري الابتعاد فورآ أو الاستمرار كن خلال أن يأتي لخطبتك ويارب يبعد عنك كل شر ويصلح حالك لكل خير
تم النشر السبت، ١٤ فبراير ٢٠٢٦
حضرتك قولتي إنك بتحبيه وهو بيحبك يبقي يجي لوالدك ويطلبك سنك صغير بس كدا أحسن من إنك تكلميه خارج شرع ربنا
تم النشر الأحد، ١٥ فبراير ٢٠٢٦
هي العلاقات الغير شرعية حرام حتي لو محترم هو لازم يظهر كدة لكن بعد كدة مفيش علاقه غير شرعية بولد وبنت وبتفضل فيها احترام ثلاثهم الشيطان
تم النشر الأحد، ١٥ فبراير ٢٠٢٦
فعلا في الاخر العلاقات دي ما هي الا استنزاف للروح والعقل والمشاعر وبتسبب التعب النفسي والجسدي ف ليه وجع الدماغ دا متستعجليش هيجي يوم وتتجوزي وهتقولي ما انا كنت عايشة اميرة انا اللي جبت وجع الدماغ لنفسي -من وجهة نظري بعد البلاوي اللي بنشوفها دي ومحاكم الاسرة الواحدة مننا ملهاش غير تعليمها ومستقبلها وانها تبقي businesswoman وstrong independent woman ويكون سندها ربنا وهي سند لنفسها وبس
تم النشر السبت، ١٤ فبراير ٢٠٢٦
ممكن استشير حضرتك في حاجه
تم النشر السبت، ١٤ فبراير ٢٠٢٦
بصي انتي قولتي انك بدأتي تكرهيه مشاعرك مش بتبقا حقيقه فهماني وقفني تتكلمي معاه وامسحي اي حاجه ليها علاقه بيه وقوليله انك هتبعدي عشان حرام ولو هو عايزك يروحي فعلا هيجي هيتقدم حتى لو كان عندك 16 ده لو بيحبك بجد ونصيحه خلي قلبك نقي ونضيف للشخص اللي هيستاهلو جوزك أن شاء الله ربنا يوفقك يروحي
تم النشر الأربعاء، ١٨ فبراير ٢٠٢٦
عندك حق بس انا في فتره مراهقه ومشاعري متلخبطه وحاسة اني ضايعه فمش حابه اتسرع في خطوات زي دي وحاولت ابعد عنو كتير بس هو مش راضي وماسك فيا مش عارفه بجد اعمل اي
تم النشر الاثنين، ١٦ فبراير ٢٠٢٦
اتفضلي
تم النشر السبت، ١٤ فبراير ٢٠٢٦
اتفضلي
تم النشر السبت، ١٤ فبراير ٢٠٢٦
لعرض السؤال في فدني اضغط هنا