انا اول مرة دلوقتي احمل الابلكيشن بس محتاجه اخد رأيكوا في حاجه
انا من شهر كدا كان فرح اختي وجه واحد من قرايبنا بس من بعيد شويه الفرح ده بعدها بعتلي ادد على الفيس من اكونتين مختلفين في الاول مكنتش اعرف اصلا أنه ده نفسه قريبنا اللي جه الفرح لحد ما وريته لماما قالت لي عادي اقبليه
المهم قبلته وفضلنا نتكلم كلام رسمي لحد ما الكلام تطور بقى فيه إعجاب ودخل في كلام حب وكدا المهم انا نهيت معاه الموضوع وقلت أنه حرام وكدا وهو تقبل ده بس كان مضايق في الاول لأنه فهمني أنه اتعلق ليا وحبني ومعرفش ايه وقالي عندك حق وربنا يكتبلنا اللي فيه الخير . عايزة اعرف هو كدا كان بيتسلى ولا بجد ناويها جد
السلام عليكم، بصي في الغالب اللي بيلجأ من الشباب للتواصل بالطريقة دي بيكون للتسلية مش أكتر وملأ فراغ عاطفي، بس لو وضعنا احتمال إنه فعلا كان فيه نية يرتبط بك فهو اختار طريق غلط وده يضع علامات استفهام. لو هو شخص جاد وعارف دينه كويس والحدود اللي ربنا وضعها كان أول ما لقى اهتمام من ناحيته ورغبة يتعرف عليكِ بنية الزواج كان هيطلب ده من أهلك أو على الأقل يوسط حد يفاتحهم ويتعرف عليكِ رسميًا. والخطوبة معمولة لده تحديدًا، إنكم تتعرفوا وتشوفوا مناسبين لبعض أو لأ. أما بقى فكرة نتعرف سوشيال ونتعلق ببعض وبعدين قلوبنا تتكسر لما منكملش كل ده مش صح وقرارك اللي أخدتِه كان مظبوط، اثبتي عليه وهو لو مهتم وجاد هيتفهم ده ولو عاوز يرتبط بك فعلا هياخد الخطوة الصح. غير كده متفكريش في الموضوع كتير وركزي في حياتك وخلي ربنا دايما رقيب عليكِ وادعيه إنه يكتب لك الخير ويرزقك بالشخص اللي يستحق. بالتوفيق.
تم النشر الخميس، ٢ أكتوبر ٢٠٢٥
و يهمك في ايه تعرفي..؟ هو انتي مكنتيش جادة في كلامك ولا.. كنتي بتقوليه و خلاص بنية انك بتضغطي عليه أو تختبريه ؟ انت عملتي الصح حتي لو النية مكانتش احسن شيء.. في الاخر اللي واخد موضوع الإبرة و كوم القش بجدية هيولع في كوم القش علشان يلاقيها.. يعني لو فعلا بيحبك و انتي صديتيه و هو جاد هيتقدم لو متقدمش متعلقيش نفسك انت اخدت قرار صح خليكي قد قرارك و متشغليش نفسك بأفكار ممكن متكونش أفكارك و تبقي مجرد وسوسة شيطان علشان يفتح ليكي الباب.. ركزي في حياتك او دراستك او مستقبلك دول اهم.. من طاقة و مشاعر و مجهود هتضيع ع الفاضي و تغضب رينا و ربنا يوفقنا جميعا ان شاء الله.. و يهدينا. 🤍
تم النشر الخميس، ٢ أكتوبر ٢٠٢٥
بصي يا بنتي هو لو كان داخل جد زي ما انت قلتي هو قريبك وجه الفرح يبقى كده عارف مامتك ولو كان عايز يدخل البيت من بابه كان دخل وخصوصا بعد ما عرفتيه انه كده حرام ومش هينفع فلو كان ناوي كان جاي اتقدم بس
تم النشر الجمعة، ٣ أكتوبر ٢٠٢٥
مكنش قالك عندك حق وربنا يكتبلنا اللي في الخير لانه فعلا لو ناوي كان قالك من اول مابدا بنكو الكلام
تم النشر الجمعة، ٣ أكتوبر ٢٠٢٥
لو كان ناوي فعلا كان فاتحيك في الموضوع وكان اتقدم على طول
تم النشر الجمعة، ٣ أكتوبر ٢٠٢٥
طبعا بيتسلى
تم النشر الجمعة، ٣ أكتوبر ٢٠٢٥
لعرض السؤال في فدني اضغط هنا