أنا جايه احكى أنى مش عارفه ارتاح فى أي حته فى بيتنا..بنت عمى عندها 3 عيال ولادها وهما متعودين ييجوا عندنا وهي بتقول ليهم يروحوا هناك عشان ترتاح هي من زنهم وهما بييجوا وأنا بحبهم وبلعب معاهم بس هما بيقعدوا كتير ممكن النهار كله وهما صوتهم عالى وأنا بحب الهدوء..
مش عارفه اعملهم إيه بس أنا بقيت مش عارفه اقعد خالص هما يعتبرو فى الابتدائي يسيبوهم عندنا وينادوا عليهم آخر الليل.. وفوق الموضوع أن جدتى ام ابويا مقيمه عندنا ليل ونهار وتنزل تنام وتيجى وهي طلباتها كتير وصوتها عالى برضوا..
انا مبقتش عارفه اقعد فى حته ودماغى صدع اقولهم إيه مفيش خصوصيه خالص لدرجة ان بنات عمى بيعرفوا كل حاجه عننا واحنا قاعدين فى بيتنا ملناش دعوه بحد. ..وهما عارفين كل حاجه اعمل إيه بجد
اقعدي في مكان واقفليه عليكي واشغلي وقتك بحاجاتك اللي المفروض بتعمليها ولما حد يسأل عليكي هيقولوا مشغولة مش فاضيه وكبري دماغك منهم عشان انتي لو قولتيلهم مايجوش تاني هتبقى فيها نوع من الزعل بس إنتي بردو مش مسئوله عن زعل حد ، جربي في الأول إنك تبقي حريصه على وقتك ومنعزله عن الدوشه ولو الحل ده مينفعش معاكي اتكلمي بحزم إنك مش عاوزة دوشة كل يوم لما ييجي عرفيهم إنك مش فاضية في الوقت ده أو عرفي امهم وماتقلقيش على زعلها عشان هي اللي مش واخدة بالها بس ان في ناس محتاجه ترتاح
تم النشر الاثنين، ١٨ مايو ٢٠٢٦
اتكلمي مع اهلك وقولي ليهم انك مش متقبلة لو هما هيتقبلو ده وحاول تتكلمي مع بنت عمك ولإنها ممكن تتقمص وتحصل مشكلة كبيرة لو جبتيها بطريقة مباشرة ممكن تتكلمي معايا وتقوليلها انك ممكن تساعديها شوية زي انك تروحي تساعديها يوم ف الاسبوع ف حاجه وتخلي عيالها عندها والموضوع فعلا محرج للمتربي ولكن مؤخرا بقيت بشوف ان لو حد سوري يعني بجح مينفعش ابدا اتعامل معاه بطريقتي اللي هى الاحترام والاخلاق لانه ببساطة مش هيفهم وهيترجم ده على انه ضعف وهى لو كويسه هتتفهم ان الموضوع بيضايقك يمكن مش واخده بالها ولكن لو اتقمصت انتي مش غلطانه وده حقك وواحده واحده هى هتفك ولكن صدقيني لو عودتي حد على انك تتحملي مشاكله وتسكتي عن حقك هيعتبر مع الوقت ان ده حقه هو... مش بقول تبقي انانية وتفكري بس ف نفسك لا طبعا فكري فيهم بس باعتدال متبقيش بتعمل الحاجه وانتي متضرره الدنيا ابسط بكتر من كده.. والاهم من ده كله ادعي ليها بالهداية وانها تلاحظ من نفسها او جوزها يقولها انه مينفعش او اي حاجه يعني المهم ادعي الدعاء مهم جداا يمكن تتحل من غير تدخل ولا مشاكل..
تم النشر الاثنين، ١٨ مايو ٢٠٢٦
السلام عليكم، رأيي مفيش حل غير إنك تكلمي والدك ووالدتك بصراحة وتفهميهم المشكلة وتأثير الدوشة وانعدام الخصوصية على حياتكم وكمان بخصوص نقطة أسرار البيت واقنعيهم بأي طريقة يضعوا حد لده ويكون فيه وقت محدد للزيارات عشان مصلحتكم. ممكن الأقارب أو ده أكيد هيزعلوا بس مع الوقت هيعتادوا، المهم يكون فيه حزم في القرار خصوصا من والدك بما إنهم أهل الأب. لو فيه إمكانية تقولي لبنت عمك وتتفاهمي معها بهدوء يبقى كويس لقيتِ مش نافع أو مش هتسمع أو تعمل مشكلة يبقى الكبار هم اللي يتصرفوا. أعتقد اللي هيكون صعب اكتر موضوع جدتك، بس هي أهون أظن من دوشة الأطفال.
تم النشر السبت، ١٦ مايو ٢٠٢٦
أنا فاهمة شعورك تمامًا يا قمر، إن البيت يبقى مليان ناس وصوت عالي طول الوقت بيخلي الواحد يحس إنه مش لاقي راحة ولا خصوصية. ده موقف صعب، ومش غلط إنك تحتاجي مساحة لنفسك. جربي تتكلمي بهدوء مع مامتك (أو أبوكي) عن الموضوع، قولي لها إنك بتحبي أولاد عمتك وجدتك بس إن الزحمة بتأثر على تركيزك وهدوءك، واقترحي حلول عملية زي تحديد أوقات معينة للزيارات أو إنك تاخدي غرفة أو ركن هادي في البيت لنفسك في أوقات معينة. كوني لطيفة وواضحة في كلامك عشان ما يحصلش سوء تفاهم. لو الموضوع مستمر ومأثر عليكِ نفسيًا، ابحثي عن أسئلة مشابهة في فدني عشان تشوفي تجارب بنات تانيين، أو روحي لصفحة الخبراء في https://www.fedni.net/experts لو عايزة استشارة أعمق. أنتِ قادرة تظبطي الأمور خطوة بخطوة، وأنا هنا لو حابة تحكي أكتر. ❤️
تم النشر السبت، ١٦ مايو ٢٠٢٦
الوضع اللي انت بتحكيه ده مدمر، لازم تحطوا حدود، اتكلمي مع والدك ووالدتك وفهميهم المشكلة وافرضي حقك لانك في بيتك ومن حقك تحسي بهدوء وراحة، انما اللي بيحصل ده اختراق لجميع الحواجز.. ده حتى شرعا لا يجوز
تم النشر السبت، ١٦ مايو ٢٠٢٦
رجعيهم لأمهم
تم النشر الاثنين، ١٨ مايو ٢٠٢٦
اتكلمى مع بنت عمك بلطف
تم النشر السبت، ١٦ مايو ٢٠٢٦
لعرض السؤال في فدني اضغط هنا